კატეგორია: სკოლა ანაბასისი

2023 წლის 23 მარტს სპს თავაძე და კომპანია სკოლა ანაბასისის ლიტერატურული კლუბის წევრებმა თავიანთ მორიგ შეხვედრაზე ქალბატონ თამარ გველესიანს უმასპინძლეს.

ქალბატონმა თამარმა 1984 წელს დაამთავრა, ქალაქის #4 საჯარო სკოლა, ფიზიკა-მათემატიკური ჯგუფი. 1987 წელს ჩაირიცხა თბილისის სახელმწიფო სამედიცინო უნივერსიტეტში, სამკურნალო ფაკულტეტზე, რომლიც წარმატებით დაამთავრა 1993 წელს.

ქალბატონი თამარი სერთიფიცირებული ექიმია. 2008-2010 წწ გაიარა ოქსფორდის უნივერსიტეტის უმაღლესი მენეჯმენტის სრული კურსი. 2008 წლამდე მუშაობდა ექიმ თერაპევტად. 2008 წლიდან, დღემდე მუშაობს საზოგადოებრივი ჯანმრთელობის ზესტაფონის მუნიციპალური ცენტრის დირექტორად.

ქალბატონი თამარი მრავალმხრივი ნიჭითაა დაჯილდოებული, ის დიდი სიყვარულით და პატივისცემით სარგებლობს საზოგადოებაში. ქალბატონი თამარი ბავშვობიდან წერს ლექსებს, რომლებიც იბეჭდებოდა „ენის სახლსა” და „უქიმერიონში”.

სტუმარმა საინტერესოდ ისაუბრა მოღვაწეობის, ლიტერატურისადმი სიყვარულის და თავისი შემოქმედების შესახებ.

ანაბასისელებმა დიდი ინტერესით მოისმინეს ქალბატონი თამარის მიერ წაკითხული ლექსები და მადლიერება გამოთქვეს საინტერესო შეხვედრის გამო.

მოსწავლეებმა სტუმარს გააცნეს ლიტერატურული კლუბის მუშაობის პრინციპი. მეათე კლასის მოსწავლე კესო კახნიაშვილმა საზოგადოებას წარუდგინა საყვარელი წიგნის შესახებ ვიდეო პრეზენტაცია.

„შეკითხვები ქალბატონ თამარს“ – ასეთი სახელწოდებით გაიმართება მომავალში მსგავსი სახის შეხვედრები მოსწავლეების და სტუმრის ერთობლივი გადაწყვეტილებით, სადაც განიხილავენ მათთვის საინტერესო საკითხებს.

სასკოლო საზოგადოების სახელით უღრმესი მადლობა ქალბატონ თამარს სტუმრობისა და თანამშრომლობისთვის!

„ჩვენთან ერთად და არა ჩვენთვის!“

21 მარტი – დაუნის სინდრომის მსოფლიო დღეა. კვირეული, რომელსაც ყოველწლიურად მსოფლიოს მასშტაბით თითქმის ყველა ქვეყანა და მათ შორის საქართველო აღნიშნავს, მიზნად დაუნის სინდრომის მქონე პირების საზოგადოებაში ინტეგრაციასა და მის შესახებ საზოგადოების ცნობიერების ამაღლებას ისახავს.

2023 წლის კამპანიის სლოგანია „ჩვენთან ერთად და არა ჩვენთვის“, რომლის ინიციატორი ორგანიზაცია „მზის შვილებია”. მისი მიზანია საზოგადოებაში გაავრცელოს დაუნის სინდრომის მქონე პირების კონკრეტულ გზავნილები:

* ჩვენ გვსურს თქვენთან ერთად ცხოვრების გაზიარება;

* ჩვენ ვართ განსაკუთრებული უნარების მქონე პირები და არა შეცოდების ობიექტები;

* ჩვენ შეგვიძლია ვიყოთ სასარგებლო ერთმანეთისთვის!

ანაბასისის მოსწავლეებმა დაუნის საერთაშორისო დღესთან დაკავშირებით საინფორმაციო შეხვედრა გამართეს სამივე საფეხურის მოსწავლეებისთვის.

შექმნეს და სასკოლო სივრცეში განათავსეს საინფორმაციო პოსტერი, დამზადდა და დარიგდა ბროშურები საზოგადოების ცნობიერების ამაღლების მიზნით.

პედაგოგები ქეთევან ედიბერიძე,თამარ მალაღურაძე,თეა სამხარაძე;

სკოლა ანაბასისის ფსიქოლოგი მარიამ წერეთელი სკოლის პედაგოგიურ საზოგადოებას შეხვდა გაწეული საქმიანობის საფუძველზე მიღებული დასკვნები და სამომავლო გეგმები გააცნო. მარიამმა შეხვედრები განახორციელა სკოლის ყველა საფეხურის კლასებთან. შეხვედრის თემატიკა დაწყებით, საბაზო და საშუალო საფეხურის მოსწავლეებთან განსხვავებული და მრავალფეროვანი იყო მოიცავდა სწავლას, ქცევას, მოტივაციას , თვითშეფასებას.შემდგომ ეტაპზე იგეგმება მშობლებთან და პედაგოგებთან შეხვედრები მოზარდთა ფსიქო -ემოციური განვითარების თავისებურებების განხილვის მიზნით. ასევე სკოლის ფსიქოლოგი იმუშავებს ყველა საფეხურის მოსწავლესთან/მასწავლებელთან/მშობელთან როგორც ინდივიდუალურად, ისე მიზნობრივ ჯგუფთან საჭიროებებიდან გამომდინარე.

ქართული ენისა და ლიტერატურის წამყვანი მასწავლებლის მარეხ ფორჩხიძის ს გაკვეთილი მე-7ა კლასში ,, რეალობა და გენდერული სტერეოტიპები ‘’საინტერესოდ წარიმართა . საგაკვეთილო თემის არჩევა მოსწავლეების აქტიური ჩართულობით მოხდა. ინსპირაცია კი ნოდარ დუმბაძის ,,ჰელადოსის“ შესწავლა გახლდათ.

,,- ეეე, სკრიპკა! – მომესმა უცებ. გაკვირვებულმა მოვიხედე.

იანგულის ცალი თვალი მოეჭუტა, კისერი მოეღრიცა, ენა გამოეყო და მარჯვენა ხელს მარცხენაზე ხერხივით ისობდა. მივხვდი, მე მაჯავრებდა ვიოლინოს დაკვრაში. ბრაზისგან გული ყელში მომებჯინა.’’ -ჯემალის ემოცია გაიზიარეს ანაბასისის მეშვიდე კლასელებმა. თხოვეს პედაგოგს ცალკე საგაკვეთილო დრო სტეროტიპებსა და რეალურ ფაქტებზე მსჯელობას დასთმობოდა.

მოსწავლეებმა ისაუბრეს სტერეოტიპებზე , რომლებიც ტრადიციის მსგავსად ხშირ შემთხვევაში თაობიდან , თაობას გადაეცემა. გენდერული სტერეოტიპები-ესაა წარმოდგენები, შეხედულებები, ცრურწმენები ქალისა და მამაკაცის ფუნქციის, შესაძლებლობების, სტატუსის შესახებ. სტერეოტიპულ დამოკიდებულებას ხშირად ვხვდებით სპორტში, მუსიკაში, ოჯახური როლების გადანაწილებაში.,

სწორედ ამ სტრეოტიპებს დაუპირისპირეს მოსწავლეებმა რეალური ფაქტები რომელიც ადასტურებსქალებისა და მამაკაცების თანაბარიმიღწევებს სპორტში, მუსიკაში , მეცნიერებაში. ..მასწავლებელი ასრულებდა ფასილიტატორის როლს . მოსწავლეებთან ერთად შეაჯამა გაკვეთილი. სტერეოტიპები ხშირად ვერ აღწერენ რეალობას და საზოგადოების განვითარების შეფერხებაც შეიძლება გამოიწვიონ. წარმატებებებ ქალბატონ მარეხს თავის მოსწავლეებთან ერთად!.

დედაჩემი ყველაზე ლამაზი ქალია….

ანაბასისის წამყვანმა პედაგოგმა შორენა მუმლაძემ პირველ ბ კლასში საზეიმო გაკვეთილი ჩაატარა: ,,გაზაფხული და დედა“.ჩვენი პატარები ლამაზი სტრიქონებით ეფერებოდნენ გაზაფხულს და დედას. გაზაფხულზე იღვიძებს ბუნება და ირგვლივ ყველაფერი ასმაგად ლამაზია. არემარე ივსება ნათელი ფერებით, მზე სასიამოვნოდ აცხუნებს. მზე აცხუნებს, მაგრამ დედა გვათბობს.

გაზაფხულზე აღინიშნება ლამაზი დღესასწაულები დედის დღე, 8 მარტი. დედა გვასწავლის სიბრძნეს, გვაძლევს რჩევებს, მზრუნველობს ჩვენზე , გვიცავს… დედობრივ სიყვარულს საზღვარი არ აქვს. ჩვენთვისაც ყველაზე ძვირფასი ადამიანი დედაა…ემოციური იყო მათი პასუხი კითხვაზე ,, ვისი დედიკოა ყველაზე ლამაზი?“. ყველა ერთხმად აცხადებდა ,,დედაჩემი ყველაზე ლამაზი ქალია…. „მრავალფეროვანი ეპითეტებით შეამკეს დედა და თავისი მოსაზრებები გულმოდგინედ დააფიქსირეს კოგნიტურ სქემაზე . ამაყად გვაჩვენეს ,რომ მათ უკვე წერა შეუძლიათ და უცხო ტექსტის კითხვაც არ არის მათთვის ძნელი. დედიკოებს პირველი ყველაზე ძვირფასი საჩუქარი გაუკეთეს- თავიანთი ხელით შექმნილი მისალოცი ბარათები, გულმოდგინედ გამოყვანილი ასოებით, სავსე თბილი სიტყვებით და სიყვარულით!

ბუნებაში არსებობს ჰარმონია და ურთიერთსიყვარული!

მე-4 კლასში მასწავლებელ ლანა ჩუბინიძის გაკვეთილი ქართულ ენასა და ლიტერატურაში საინტერესოდ წარიმართა.

გაკვეთილის თემა : ვაჟა-ფშაველას ,, ია” მიზნები: მხატვრული ტექსტის კითხვა და ანალიზი. ლექსიკური მარაგის გამდიდრება ლექსის მხატვრული კითხვა ‘მარტივი საგანმანათლებლო ინფორმაციის მიწოდება ტექსტის ავტორზე .მსჯელობა მხატვრულ ნაწარმოებში ასახულ ამბავსა და პერსონაჟებზე.

მასწავლებელმა კარგად დაგეგმილი აქტივობებით შეძლო მოსწავლეებს ერთმანეთთან დაეკავშირებინათ გაზაფხული, დედა და ია… მოეფერენ ლამაზი სიტყვებითა და ლექსებით მათ. შეძლეს ტექსტის გაგრძელებითი კითხვა, შესრულდა ჯგუფური სამუშაო (პირამიდა) , გაეცნენ უცნობ სიტყვებს , დაახასიათეს ია .

ია-ვაჟას საყვარელი ყვავილია. პოეტისათვის ია უბრალოდ მცენარე კი არა, სულიერი არსებაა. ია ფიქრობს, მეტყველებს, განიცდის, უხარია… ადამიანივით. ია მიწიდან ჩნდება და მერე ისევ მიწას მიებარება.

მოსწავლეებმა უპასუხეს კითხვებს: რით გამოირჩევა უღრან ტყეში ამოსული პატარა ყვავილი? რატომ ნატრობს ის სიმღერის ნიჭს? ვინ ან რა მიაჩნია იას მფარველად? რატომ მოსწონს თავი იას. ამის შემდეგ მოსწავლეებმა დაახასიათეს პერსონაჟები, რომლებიც იის გარშემო არიან და მას სიცოცხლეს ულამაზებენ. ამ კითხვებზე პასუხების მოსმენისა და დისკუსიის შემდეგ შემდეგ მოსწავლეებმა გამოიტანეს დასკვნა – ბუნებაში არსებობს ჰარმონია და ურთიერთსიყვარული.

გაკვეთილი დაეხმარა მოსწავლეებს, უფრო შეიყვარონ და შეიგრძნონ ბუნება, მეტი მზრუნველობა გამოიჩინონ მის მიმართ, გააცნობიერონ, რომ ბუნების დაცვა მათი მოვალეობაა.გაკვეთილმა მიზანს მიაღწია იგი პოზიტიურად გაზაფხულის მხიარული სიმღერით დასრულდა.

წარმატებები ლანა მასწავლებელს მე-4 კლასელებთან ერთად!

ანაბასისის მეექვსე კლასში სასკოლო პროექტის „ჩემი კულტურა ჩემი სიმდიდრეა” ფარგლებში განხორციელდა კომპლექსური დავალების შემაჯამებელი პრეზენტაცია.

საგანი – ჩვენი საქართველო;

თემა -„ გურია-კურორტებით მდიდარი მხარე“.

კომპლექსური დავალების პირობა:

წარმოიდგინეთ, რომ ხართ ჟურნალისტი და უნდა დაწეროთ სტატია გურიის კურორტების უნიკალურობის შესახებ .

სტატიაზე/ნაშრომის პრეზენტაციისას ხაზგასმით წარმოაჩინეთ:

• როგორია თქვენს მიერ შერჩეული კურორტის გეოგრაფიული მდებარეობა, რელიეფი და კლიმატის თავისებურებები ?

• როგორ ახდენს გავლენას ბუნებრივი პირობები და რესურსები გურიის რეგიონში მეურნეობის დარგების მიმართულებასა და ადამიანთა საქმიანობაზე?

• გურიაში მცხოვრები ადამიანებისთვის რამდენად მნიშვნელოვანია კურორტების განვითარება? რატომ არის საჭირო კურორტის შენარჩუნება და მისი დაცვა ?

• როგორ დააინტერესებ ტურისტს გურიაში არსებული კურორტებით?

• რა საშუალებებით ზრუნავს/უნდა ზრუნავდეს სახელმწიფო კურორტების განვითარებით?

მოსწავლეებმა საინტერესოდ წარმოაჩინეს საკუთარი ცოდნა/დამოკიდებულებები გურიის და ზოგადად, საქართველოს კულტურული მემკვიდრეობის შესახებ;

გაკვეთილზე მონიტორინგს ახორციელებდა სკოლის ხარისხის განვითარების ჯგუფი.

ჩვენი საქართველოს პედაგოგი თეა სამხარაძე.

1 მარტს სკოლა ანაბასისში “ტვინების ბრძოლის” შიდასასკოლო ჩემპიონატი გაიმართა, რომელშიც მოსწავლეები დიდი ინტერესით და ხალისით ჩაერთვნენ.

2023 წლის გაზაფხულის სეზონზე საქართველოს ჩემპიონატის ფარგლებში, თებერვლისა და მარტის თვეები დაეთმობა “ტვინების ბრძოლის” შიდასასკოლო ჩემპიონატების” ჩატარებას.

2 აპრილს რეგიონული პირველობა გაიმართება, ხოლო 23 აპრილს – ფინალი.

მადლობა “ტვინების ბრძოლის” ჩემპიონატის ხელმძღვანელ გუნდს საინტერესო შემოთავაზებისთვის, ჩვენს მოსწავლეებს და პედაგოგებს აქტიური ჩართულობისა და თამაშის ორგანიზებულად ჩატარებისთვის!

პედაგოგები თეა სამხარაძე, ქეთი ყიფიანი, თამარ მალაღურაძე, თამარ გვალია, ქრისტინე ჩუბინიძე.

2023 წლის 9 თებერვალს სკოლა ანაბასისის ლიტერატურული კლუბის მორიგი შეხვედრა გაიმართა.

განხილული იქნა სოფი ჰანას „მონოგრამიანი მკვლელობები“, ნამდვილი დეტექტივი.

მეათე კლასის მოსწავლე კესო კახნიაშვილმა საინტერესოდ წარუდგინა თანატოლებს თავისი შეხედულებები და შთაბეჭდილებები ნაწარმოების შესახებ.

გასული საუკუნის 20-იანი წლების ლონდონი… ერკიულ პუაროს კონტინენტზე უკვე აქვს მოპოვებული დიდი მაძებრის სახელი, მაგრამ ნისლიან ალბიონზე პატარა ბელგიელს ჯერ არავინ იცნობს. მას მალე ეძლევა თავისი უნიკალური მაძებრული ნიჭის გამოვლენის საშუალება _ ლონდონის ერთ-ერთი ფეშენებელური სასტუმროს სამ სხვადასხვა ოთახში სამი ცხედარი იპოვეს და რაც ყველაზე უცნაურია, სამივეს პირში ერთი და იგივე მონოგრამიანი ოქროს საკინძე უდევს. ეს სამმაგი მკვლელობაა, მაგრამ რატომ და როგორ? დიდი ერკიულ პუარო ამ თავსატეხსაც ჩვეული ოსტატობით ამოხსნის.

ლიტერატურული კლუბის მიზანია, მოსწავლეებს გაუღვივოს უწყვეტი სწავლის სიყვარული, მისცეს მათ შესაძლებლობა, ენთუზიაზმით მოეკიდონ და მოიხიბლონ ლიტერატურის სამყაროთი. განივითარონ კრიტიკულ-ანალიტიკური აზროვნების უნარები,გაეცნონ სხვადასხვა ჟანრის ნაწარმოებებს და ერთმანეთს გაუზიარონ შთაბეჭდილებები.

კლუბის წევრები კვირაში ერთხელ ერთმანეთს წარუდგენენ თავიანთ საყვარელ ნაწარმოებებს, ჩაერთვებიან საინტერესო დისკუსიებსა და დებატებში იმ მრავალფეროვანი თემატიკიდან და უსაზღვრო შესაძლებლობებიდან გამომდინარე, რასაც მსოფლიო ლიტერატურის ფართო სპექტრი იძლევა.

კლუბის პოზიტიურსა და შემეცნებით გარემოში წახალისებულია ლიტერატურის სიყვარული.

საინტერესო და შემეცნებითი გარემო მოსწავლეებს აძლევს შესაძლებლობას თამამად გამოხატონ თავიანთი აზრი წერილობით და ზეპირმეტყველებით, მიიღონ ცოდნა და სხვასაც გაუზიარონ საკუთარი გამოცდილება.

პედაგოგები ქეთევან ედიბერიძე, თეა სამხარაძე, მარეხი ფორჩხიძე.

“სტუმრად ცნობილ ადამიანებთან”.

სკოლა ანაბასისში პროექტი „ვაქციოთ სკოლა გენდერული პასუხისმგებლობის მქონე დაწესებულებად“ აქტიურად მიმდინარეობს გაეროს ქალთა ორგანიზაციის (UN WOMEN) და UNFPA პროექტის „EU4 გენდერული თანასწორობა: ერთად სტერეოტიპებისა და გენდერული ძალადობის წინააღმდეგ“ ფარგლებში პარტნიორი ორგანიზაციის, სამოქალაქო ინტეგრაციისა და ეროვნებათშორისი ურთიერთობების ცენტრის (CCIIR) ორგანიზებით, რომელიც ხორციელდება ევროკავშირის ფინანსური მხარდაჭერით”.

ამჟამად პროექტის ფარგლებში საინტერესოდ წარიმართა აქტივობა „სტუმრად ცნობილ ადამიანებთან“ , რომელიც X კლასის მოსწავლეებმა სამოქალაქო განათლებაში პირველ პროექტულ სწავლებაში შერჩეული პროექტის ,, გენდერული მეინსტრიმინგისათვის” მიმართულებით დაგეგმეს.

აქტივობის მიზანი იყო ქალთა შესაძლებლობების შესახებ სტერეოტიპების და მითების მსხვრევა;

პროექტის სამიზნე ჯგუფის წევრებმა მოიძიეს ინფორმაცია მუნიციპალიტეტში თემის აქტივისტი ქალბატონების შესახებ, ვინც თავი დაამახსოვრა ზესტაფონის (და არა მარტო ზესტაფონის) საზოგადოებას თავისი საქმიანობით და პროფესიონალიზმით.

მოსწავლეები ესტუმრნენ ზესტაფონის საზოგადოებრივი ჯანმრთელობის ცენტრის ხელმძღვანელს ქალბატონ თამარ გველესიანს, რომელიც მოსწავლეებს საინტერესოდ ესაუბრა თავისი მოღვაწეობის შესახებ.

შეხვედრის დასასრულს მოსწავლეებმა ქალბატონი თამარი სკოლაში მიიწვიეს, სადაც დაგეგმილია მთელი სასკოლო საზოგადოების შეხვედრა ცნობილ ადამიანებთან.

მადლობა ქალბატონ თამარს საინტერესო და გულთბილი მასპინძლობისთვის, რომელიც ახალგაზრდების თქმით, მათ მეხსიერებაში სამუდამოდ აღიბეჭდა.

პედაგოგები ქეთევან ედიბერიძე და თეა სამხარაძე.